BRU-AGSB-Z-70

Algemene gegevens

Type: Bevestiging door verscheidene baljuws en hoofdmannen van de verkoop van grond en woning, en de daaropvolgende inpachtneming van die grond en woning te Lampernisse en Zoutenaaie door jonkvrouw Maergriete, weduwe van Clays Walen

Beschrijving: De baljuw van de hernesse van de kerk van Sint-Pieters te Aire-sur-la-Lys te Lampernisse in Zoutenaaie en de baljuw van de hernesse van Yhan Lauward te Lampernisse en baljuw van de hernesse van de kerk van Vicogne, en de hoofdmannen van de genoemde hernessen, laten weten dan jonkvrouw Maergriete, weduwe van Clays Walen, en haar kinderen met hun voogden, een hofstede en een woning, met daarbij 14 gemeten land te Lampernisse en 3 gemeten land te Zoutenaaie, verkocht hebben aan Clayse de Kuts. De verkopers verklaren dat zij hiervoor volledig betaald werden. Hierop nam jonkvrouw Maergriete het land en de woning weer in pacht van Clayse den Kuts, voor een erfelijke rente van 10 pond parisis per jaar (+ bijkomende voorwaarden).

Tekst

[VOORLOPIG]

Wie Pierin Tshoerlin baellieu up die hernesse der kaerke sinte pieters van Arye in Lampernesse in Zoutenay, ende Boidin Shoerlin baellieu up Yhan Lauwards hernesse in Lampernesse ende baellieu up der kaerke hernesse van vicoenge, of te deiser dachvaert wet te doene bi kennessen vanden herden, ende wie hooftmanne ende herden van olle den vorseiden hernessen, Clays de Raet, Clays Mathys ende Willem de Kic ende wie Yhan Yorkin ende Lotin prisonier, hooftmanne ende herden zonderlanghe van der vorseider kaerke van Arye, ende wie Robrecht de Crane ende Woite Kerke hooftmanne ende herden sonderlanghe van der kaerke van Vicoenqze ende van Yhan Lau wards hernesse, doen te wetene olle den gonen die deise lettre sullen zien yof horen leisen dat joncvrouwe Maergriete Clays walen weidewe ende hare kindre Clays de Wale, Mich. de Wale ende Willem de Wale Lisebette ende Annees met haren vogheden, sijn comen vor ons ende hebben verkennet te wetten, dat sie hebben verkocht wel ende loyaleike Clayse den Kuts ene hofsteide ende woeninghe der upstaende met viertiene ymette lants luttel min yof meer derbi ligghende daer wilen Clays de Wale os hi leivede woende in Lampernesse inder kaerke van Viscoenge ende Yhan Lauwaerds hernesse ende drie ymette lants litel min of meer ligghende der bi inder kaerke van Arye hernesse in Zoutenay, ende dit vorseide lant hebben die vorseide joncvrouwe Margriete ende hare vorseide kindre up ghedraghen wetteleike in onse vorseide baelliers handen omme den coper der meide te ervene bi wijsdome van ons vorseiden herden ende hebbens halm ende ghifte gheworpen ende van hem ghepl[...?] ende wech gheworpen ende ol ghedaen dat wet in heivet om hem zelver der of tontervene ende [...?] te ghane ende den copere tervene bi maninghen van ons vorseiden baellieuws ende bi wijsdome van ons vorseiden herden nader wet van Vernambocht ende der usage vanden vorseiden hernessen ende Pierin ende Boidin vorseide baellieus bi wijsdome vanden vorseiden herden, erveden den vorseiden copere Claise den Kuts van ol den vorseiden lande wetteleike ende daden ol der toe dat die her den wijsden ende dat wet in heivet om hem wel ende wetteleike tervene, ende daer of beloveden die vorseide vercopers joncvrouwe Margriete ende hare kindre ende elc over ol den vorseiden coper wedde ende waerscheipe ende bove ol deisen maenden wie baellieuwe de vorseide herden bi haren ede ende bider trouwe die sie sijn schoudich haren heerscheipe yof die vorseide vercopers, joncvrouwe Margriete ende hare kindre van ol den vorseiden woninghen ende lande zo wel ute ende ontervet waren ende de vorseide copre Clays de Kuts zo wel ende zo wetteleike gheervet dat hiet mochte houden tollen daghen over sijn erveleicheide ende sijn eghine goet, ende wie vorseide herden bi maninghen van onsen baelliews, kenneden ende zeiden bi onsen ede ende bider trouwe die wie sijn schoudich onsen herscheipe dat ons dochte dat van ol den verseiden lande ende woeninghe die vorseide vercopers joncvrouwe Margriete ende hare kindre zo ute ende ontervet waren ende die vorseide Clays de Kuts zo wel ende wetteleike yiervet dat hie ol dat vorseide lant mochte wel houden eweleike tollen daghen over sine erve ende sijn eghine goet, ende van den vorseiden husen ende lande hilden ende kenneden hem de vorseide vercopers vor wetten wel ende vulmakelike betaelt vanden vorseiden Claise ende wie de vorseide baellieus hilden ende houden over wel ghepayt van onser heren rechte de welke zeiventiene yiemette lants litel min of meer ende de woeninghe der boven die vorseide joncvrouwe Margriete ende hare kindre hebben ghenomen vor ons vorseide baellieus ende herden over hem ende over hare ooc tenen erveleiken rhente te houdene tollen daghen vanden vanden vanden vorseiden Clayse den Kuts yof den gonen die deise lettre zal hebben rechtelike van Clayse, omme tien pont goeder parisise erveleiker renten ysiaers, de welke rente joncvrouwe Margriete ende hare kindre vorseid zijn schoudich te gheldene ende te ghevene eweleike tollen daghen ute ende quite tonthdraghene den vorseiden Clayse den Kuts yof den gonen die deise lettre zal bringhen, boven allen andren lasten daer daet lant meide ghelast es jof word, te tween payementen int jaer, dats dene helt te meidewintre eerst comende ende dandre helt te sinte yhansmesse midsomers daer na volghende ende al zo van yare te yare eweleike gheduerende tollen daghen, ende vord so est rechte verworde dat elc ymet vanden vorseiden lande es gheladen ende ghehouden over ol deise vorseide rente, ende waert so dat teen payement achterhaelde tander neware eer yegonden ende Clays of die deise lettre bring ghet dat seide in sine wareide ende in sine ziele sonder andre proeve te doene, so mochte Clays jof die deise lettre bringhet hant slaen an ol dat vorseide lant ende woninghe ghehelike ende trecken an hem over sijn eghine goet ende sine propre erve ysawen ende yelanden al so hiet vonde zonder enich weider zegh nemmermeer andre wetleicheide toe te doene, ende sijn schoudich de vorseide joncvrouwe Margriete ende hare kindre te uphou dene staende ende ychaefdech wel ende soufisantelike de vorseide husinghen up haer selves coste van ol, ende omme dat wie vorseide baellieuwe hoftman ne ende herden willen dat dit vast zi ende ghestade verkennet ende wel ghehouden, zo hebben wie deise lettre gheseighelt wie vorseide baellieus voren ende daer naer wie hoftmanne ende herden elc met sinen propren seighele huuthanghende in oorconscheipe ende tekene van wareiden bi beiden ende versoeke van partien, deise wetleicheide ende deise kennesse was ghedaen ende verkennet al so het hier voren yescreiven es int yaer ons heren dusentech drie hondert ende twaleve