BRU-AGSB-Z-171

Algemene gegevens

Type: Bevestiging door de schepenen van Ieper-Ambacht van een ruil van grond tussen de abdij van Zonnebeke en Jacop Moreel

Beschrijving: De schepenen van Ieper-Ambacht laten weten dat meester Joos de Wale, priester, prior, ontvanger en procureur van de abdij van Zonnebeke, en Jacop Moreel, poorter van Ieper, land geruild hebben (+ beschrijving van de stukken grond).

Tekst

[VOORLOPIG]

Wy Phelips van Grebonael Roeland Bossaerd Pieter de Clerc Jan Canin ende Jacop vander Veste scepenen vanden Yperschenambachte doen te wetene allen lieden dat voor ons commen ende ghecompareirt zijn in persoonen meester Joos de Wale presbytre prior ende ontfanghere vanden cloostere ende convente van Zunnebeke als procureur ende moghende over tvorseide cloostere ende convent van Zunnebeke over een zyde ende Jacop Moreel poorter vander stede van Ypre over andere de welcke comparanten verkenden dat zij onderlinghe ghemaect hebben een vriendelicke wisselinghe van lande diemen zecht laghe in deser manieren ende condicien Te wetene dat tvoornomde cloostere ende couvent hebben zal bij rechter laghe vande voornomde Jacop Moreel vijf ghemeten lands of daerontrent danof drie ghemeten twee lijnen vierwarftwyntich roeden ligghen inde prochie van Zunnebeke al theenen sticke onder mijnen heere den abt heere van Zunnebeke west vander straetkin dat loopt naer Beselare oost vanden straetkinne dat loopt naerden aendepoel zuudt vanden lande van mijnen voornomde heere ende noordt vanden dissche lande van Zunnebeke, Item noch een ghemet zessentsestich roeden lands ligghende onder mijnen voornomde heeren west van eenen straetkin dat loopt naer Beselare, belast beede voorseide partien van lande met sheeren seins jarlicx daeruute gaende ende anders niet daervooren de voornomde meester Joos inde qualitheyt als boven gheift in rechter laghe den voornomde Jacop Moreel vijf ghemeten twee lijnen lands of daerontrent ligghende in drie parseelen Eerst onder de zale van Ypre twee lynen landz ligghende noordt vander Roesselarestrate inde prochie van Passchendale zuudt vanden lande van wylen Alaert de Blonde ende west vander beke Item veertien lijnen lands ligghende inde prochie vander Hazelt inde prochie van Nieukercke ghelandt an allen zijden Joos van Lange ende clam? van zijnder moedere Item een lijne lands ligghende de vorseide parceelen met sheeren seins ende anders niet, de welcke voornomde comparanten hebben de voornomde lande elc andren upghedreghen quyte ghescholden halm ende ghifte ghegheven naer wetten costumen ende uusaegen vander Yperschen ambachte Ende hebbens elc andren ghelooft goed gherechte warandscip zonder calaenge jeghens allen lieden landt landt laghe om laghe zonder nemen of gheven. in kennessen der warheden Soo hebben scepenen boven ghenoompt dese presente lettren ghedaen zeghelen met onsen zeghelen uuthanghende dit was ghedaen int jaer duust vijfhondert

Zunnebeke wisselijnghen van landen ghedaen deur tclooster ende een Jacob Moreel int jaer 1500