BRU-AGSB-Z-190

Algemene gegevens

Opmerkingen analytische datum: Bijkomende datering in de bron: "Actum Lille le Xve jour de juillet mil vC et dixhuit (?)" (15/07/1518; datum van registrering in de rekenkamer van Rijsel) en "den xiiiien dach in julio int jaer duusent vijfhondert ende seventhiene" (14/07/1517; goedkeuring door de hoofden en tresorier-generaal).

Type: Amortisatie door Karel [V] van de nieuwe aanwinsten van de abdij van Zonnebeke

Beschrijving: Amortisatie door Karel [V] van de goederen die de abdij van Zonnebeke in de voorbije 40 jaar gewonnen had (+ specificatie van de goederen) en dit voor de som van 150 pond parisis.

Tekst

Kaerle bijder gracie gods Coninck van castillen van leon van grenade van Arragon van Nauarre van beede den Secillien van Jh[e]r[usa]l[e]m van valence van maioke van sardene van corsice [et]c[etera] ertshertoge van oistrijck hertoge van bourgoingnen van lothrick van Brabant van Stiere van carinte van carinole van lembourch van lucemborch ende van geldre graue van vlandren van habsbourg van tijrol van artois van bourgoingnen Palsgraue ende van henegauwe Lantgraue van elsas Prince van zwaue marcgraue van bourgauw ende des heilichs Rijcx van hollant van zellant van phirt van Kibourch van Namen ende van zutphen graue heere van vriesla[n]t vp de windismarct van portenauw van salins ende van Mechelen Doen te wetene allen lieden Jegewordich ende toecommende dat wij ontfanghen hebben dit oedmoedege suppl[icati]e vanden abt ende conuent van onser vrauwen keercke te zinnebeke Jnhoudende hoe zij binnen xl Jaeren herwaerts vercreghen hebben die parcheelen van land[en] Renten ende ander goedinghen daerof die declaratie hiernaer volcht: Eerst zes ponden par[i]s[is] ts[iaer]s erfuelicke Renten te lossene den penninck zestiene bezet vpden spijk[er]e van ypre ghecocht bij Jan minne Jtem xii £ par[i]s[is] eruelicke Renten ts[iae]rs te lossene den penninck vijfthiene ghecocht bij wijlen [christi]aen de Wale beset vp een huus ende erfue staende binder stede van ypre ande noortzijde vander thoroutstraete toebehoorende gooris Balefelt Jtem ix £ par[i]s[is] erfuel[icke] Rente ts[iaer]s te lossene den penninck zeue[n]tiene bezet ende geypotequiert vp eene behuusde hofstede ligghende Jnde prochie van boesinghe wijlen toebehoorende claijs Verneese zone welcke welcke drie partien van Re[n]te[n] den voors[eiden] clooster toecommen zijn van eenen meester Joos de Wale Religieulx Jnt voors[eide] clooster Jtem vj £ par[i]s[is] eruelicke Rente tsiairs te lossene den penninck xxij beset vp zes gemeten Landts of daeront[ren]t ligghende Jnden hooghenackere Jnde prochie van Langhemarck noordwest vander kercke toebehoorende paesschier de brouckere Jtem een huus ende erfue staende binder stede van Weruicke onder de heerlichede vanden oosthoue ghecocht Jeghen Soyer vand[en] thune als procureur ende moghende van mer Jan verdiere Rudder ende vrauwe Joosijne colins zijnder gesellenede belast met xlij s[cele] v d[enieren] par[i]s[is] eruelicke Rente ts[iaer]s Jtem een ghemet Landts of daerontrent onder meersch ende wijnnende landt Ligghende Jnde voors[eide] prochie van zinnebeke ande zuudzijde van scloosters muelene an dland van Jan acket oost zuud ende west ende es den clooster toecommen van stragiers ende bastaerde goede bijden ouerlijdene van wijlen ysabeele vanden voorde twijf was van [christi]ae[n] storm Jtem xxx s[cele] par[i]s[is] eruelicke Rente ts[iaer]s beset vp twee bundren ende thien hondert Landts onder meersch ende wiinnende Landt Ligghende zom Jnde prochie van busbeke ende zom onder de heerlichede vanden ghemeene tselue beset toebehoorende Joos vanden voorde wonende te leynzele Jtem x s[cele] par[i]s[is] eruelicke Rente ts[iaer]s die vrauwe katheline van haelewijn Jn hueren Leuene Burchgraefnede van roesselaere /hadde up tgoedt vanden cloostre in Noortscote die zou den clostre quite ghescholden heeft ende gegeuen ter pitanche vanden voors[eiden] conuente ende bijdien es tgoed vanden cloostre daerof ontlast Jtem een leen genaempt den mispela[er]e bij heml[ieden] ghecocht Jeghen Willem saelemoen ligghende Jnde prochie van Waestene vermoghende eenen bailliu ende eenen a[m]man en[de] alle Justicie hooghe middele ende nedere te doene met verleenden mannen ende scepenen vanden heere daeraf dat ghehouden es Ende es dit leen ghehouden van adriaen vanden Walle van zijnen ghenootscepe ghenaempt ter Douye twelcke hy houdende es vanden graue van bryane van zijnder burch ende casteele van Waestenne groot tvoorn[omde] Leen vanden mispelaere onder penninck Rente[n] cappoen Rente[n] ende enen xx £ par[i]s[is] ts[iaer]s of daerontrent Ende hoewel sichtent den acquesten bijden voors[eiden] suppl[iante]n aldus gedaen binnen den tyde voorscreuen zij vanden voors[eiden] partien van Renten ende Landen bouen verclaert vredelick ende zonder belet tot nv toe ghebruijct hebben Nietmin ouermidts dat zij vanden seluen partien van ons oft onse voorders geen brieuen van octroye ende admortissemente vercreghen en hebben zij beduchten datmen heml[ieden] hiernamaels Jnt gebruijck vanden seluen partie[n] belet zoude moghen doen bij ghebreke vanden seluen brieuen van octroye ende admortissemente Twelcke heml[ieden] commen zoude tot groote scade ende achterdeele Jndie[n] onse gracie ende goedwillicheyt heml[ieden] hierop niet verleent en worde Daeromme zij ons zeer oedmoedelick ghebeden ende versocht hebben So eist dat wij de saecken vorscreuen ouerghemerct ende dat wy hopen ende meenen den almuegenden god bequamen dienst te doene als wij verstaen tot zaecken angaende de weluart vermeerderinghe augmentacie ende onderhoudenisse vanden fondacien vanden kercken ende goddelicken diensten ende zonderlinghe ten fijne dat onse voorders wij en[de] onse n[aer]commers deelachtich mochten wesen Jnde deuote bedinghe[n] ende weldaden diemen doet ende continueren sal Jnden voors[eiden] conuente van zinnebeke Ende daerup gehadt taduis van ons[en] lieuen ende getrauwen die hoofden ende tresorier g[e]n[e]ral gecommitteert vp stick va[n] ons[e] Demeynen ende finan[cen] wij hebben den voorn[omden] suppl[iante]n genege[n] wesende tot huere voors[eide] bede ende begeerte Bij goede ende Rijpe delibera[ti]e van Raede vuyt onser Rechter wetentheyt auctoritheit ende vulcomme[n] machte voor onse erue ende naecommelinghen geadmortisseert ende admortisseren vuyt zonderlinge gra[ti]e midts desen ons[en] brieue de partien van landen Renten ende and[er]e goedinghen hiervooren gespeciffi[eer]t ende verclaert ende elck van dien willende ordonnerende octroyerende ende accorderende den seluen suppl[iante]n dat zij alle die voors[eide] partien van Renten ende lande ende elck va[n] dien bijzondre zullen moghen houden ende ghebruucken vredelick vulcommelick ende tot eeuweghen daeghe als van gheadmortisseerden goeden gegheuen ende geordonneert gode en[de] der heiligher keercke zonder dat de selue suppl[iante]n ofte huere naecommelinghen zullen moghen bedwonghen worden de selue goeden te moeten habandonneren vercoopen transporteren alieneren oft anderseins vuyt hueren handen te stellene by gebreke van admortissemente Behoudelick dat zij t[er] caus[en] van des[en] ons[en] octroye en[de] admortissemente gehouden zullen wesen te betaelen Jn handen van onsen beminden nicasi[us?] hanneron By ons gecommitteert totten ontfanghe vanden penninghen commende ende procederende van zulcke ende ghelijcke admortissementen Jn ons[en] Landen ende graefscepe van vlaendren De somme van hondert vijftich ponden par[i]s[is] vlaemscher munten van xx groo[te]n tpondt eens tot welcke somme die commissarissen by ons gheordonneert vp stick vanden acquesten ghedaen binnen den voors[eiden] xl Jaeren herwaerts bijden suppl[iante]n ende ander geestelicken lieden Jn onsen voors[eiden] lande ende graefscepe van vlaendren Die finance van desen octroye ende admortissement getaxeert hebben ende van welcker somme de selue ontfangher oock gehouden sal wesen ontfanck te makene Rekenninghe ende Relicqua te doene tot onsen prouffijte metten andren penninghen van zijnen ontfanghe Vp condicie nochtans dat Jndien de losRenten ende andere partien van erfuen bouen gespecyffiert diemen zoude moghen quiten ofte lossen oft eenighe van dien hiernaemaels ghequeten ofte ghelost worden De voors[eide] suppl[iante]n ende huere naercommers zullen moghen Remploy[er]en ende belegghen de penninghen die d[aer]of commen zullen Jnde coope van ghelijcke LosRenten ofte eruen tot ter somme toe vander Lossinghe van zulcken parcheelen vuyt gesceeden Leengoedt heerlicheijt ende Justicie welcke Renten ofte erfuen wij al nv voortan en dan voor nv Jnden geualle als bouen geadmortisseert hebben ende admortisseren midts desen wel verstaende dat zij gehouden zullen wesen te doen blijcken binnen eenen Jaere vander voors[eide] Lossinghe ende Remploye ende die partien dat zij daermede gecocht ende ghecreghen zullen hebben ouer te gheuene Jn onse cam[er]e vander Rekenninghe te Rijssele Ende dat wij vp die voors[eide] partien van erfue[n] ende andere die zij naemaels zullen moghen vercrighen bij Remploije hebben ende behouden zullen voor ons onse voors[eide] erfuen ende naecommelinghen te wetene vp de parcheelen van ons gehouden zonder middele alle Justicie ende heerlicheijt Ende vp die ghene van ons ghehouden bij middele de hooghe Justicie metgaeders oock ons Recht vpden gront van erfuen gheypotequiert voor die voors[eide] Renten Jndien de selue erfuen hiernaemaels afgewonnen worden ter causen vanden seluen Renten Ende dat die selue erfue ende Lande zal bliuen contribuable ende ghelast Jnde pointinghe[n] zettinghe[n] ende beden die Jn toecommende[n] tijden ghepoint ghezet ende geheue[n] zullen worden Jn onse[n] voors[eiden] Lande ende graefscepe van vlaendren Jn alder manieren als zij waeren voor dese onse gracie ende admortissacie Ontbieden daerom ende beuelen onsen lieuen ende getrauwen die lyeden van onsen voors[eiden] Rekeninghen te Rijssele dat die voors[eide] somme van C L £ par[i]s[is] munten voors[eit] betaelt ende vuyt ghe[...?]eect zijnde den voors[eiden] nicasi[us?] hanneron onse ontfanghere als bouen zij Registreren of doen Registreren des[en] onsen brief Jnde Registers vander zeluer camere daertoe diennende en[de] behoorende Procederende voort wel ende duechdelick tot veryfficatie ende Jnterinemente van des[en] n[aer] huere vorme ende Jnhouden En[de] dat ghedaen zij onsen president ende lieden van onser camere vanden Raede Jn vlaendren de voors[eide] hoofd[en] ende tresorier g[e]n[e]ral van onsen demainen ende financien Ende alle andre onse Rechters Justiciers ende officiers wyen dit angaen ofte anroeren mach huere stedehouders Jeghewordich ende toecommende ende een yeghelick van hem zonderlinghe zoo hem toebehooren sal doen laeten ende ghedooghen de voors[eide] suppl[iante]n ende huere n[aer]commers van dese onse gracie octroye admortisacie ende van alden Jnhoudene van des[en] Jnder voughen ende manieren vooren verhaelt Rustelick vredelick vulcommelick ende eeuwelick ghenyeten en[de] ghebruijcken Sonder heml[ieden] te doene ofte te laeten gheschiene[n] nv oft Jn toecommende tijden eenich hinder letsel oft moyennesse ter [con]trarien Want ons[?] alsoo ghelieft Niet Jegenstaende eenige ordonnancen Restrincten[?] geboden ofte verboden t[er] contrarien Ende ten hende dat dit goed vast ende gestadich bliue tot eeuweghen daeghen wy hebben ons[en] zeghele hieran doen hanghen Behoudelick Jn andren zaecken ons Rechts ende een yeghelicx Rechts Jn allen Ghegheuen Jn onse[n] stadt van Ghendt Jnde maent van meije Jnt Jaer onsheeren duust vijfhondert ende zeuenthiene Ende van ons[en] Rijcke Tweste

Bijden conijnck die heere van montignie heer nicasi[us] hackeney hoofden meester Jan Ruffault Tresor[ier] g[e]n[er]ael vand[en] finan[cien] en[de] and[er]e Jegeword[ich]

[...?] Haneron

Ceste chartre este enregistree en la chambre des comptes a Lille Ou seco[...?] admortissement de terre Comment haut en Justice quinze[?] Cens seize [...?] et y Jnterinees par les Gens desd[its] comptes selon leur forme et te[neur?] [com-?] me le Roy le veult ordonne et mande estre fait par Jcelles Act[um] Lille le xv.e Jour de Juillet mil v.C et [...?]

Moy p[rese]nt P. Josquiele

Die hoofden en[de] tresorier g[e]n[er]ael geco[m]mitteert vp tstuck vander demeynen ende financien vand[en] Coninck van Castillien van Leon van grenaden van Arragon [etcetera] Ertshertoghe van oistrijcke [etcetera] Consenteren alsoo verre alst Jn hen es dat dinhoudt Jnt witte van desen volco[m]men zij gelijck ende Jnder manieren als mijn[en] genadigher he[er]e Den Coninck dat wilt ende beueelt gedaen te zijne bij des[en] bescreuen onder die handteykens vanden voirs[eiden] hoofden ende tresorier g[e]n[er]ael Den xiiij.en Dach Jn Julio Jnt Jaer duysent vijfhondert ende Seuenthiene

[handtekeningen, soms heel moeilijk leesbaar:]

[Etsche...?]

Nicasi[us]

Ruffault

Zonnebeke L[ett]ren van amortissemente van v[...?]j £ p[arisis] s[iaer]s pen[ninck] xvj.e vpden spijcker van [ypre?] xij £ p[arisis] s[iaers] pen[ninck] xv vp [...?] in[de] thorout s[...?] ix £ p[arisis] s[iaer]s pen[ninck] xvij.e vp een hofstede in boesijn[ghe] vj £ p[ariis] s[iaer]s pen[ninck] xxij.tich [...?] ghe[...?] Land[...?] in Lange[...?] de[n] huus en[de] erfue binne[n] weruicke[n] een ghemet Landts bij zonnebeic muele[n] x[...?]x s[chele] p[arisis] s[iaer]s vp twee bunderen landts Jn busbeke x [...?] s[chele] p[arisis] s[iaer]s vp tgoet van[t] clooster Jn Noorsschote t leen ghe[...?] den Mispelare in waestene [...?] van[de] douie [...?] hooghe [...?] [...?] Jncluis

Amortisatio facta per Carolu[m] regem anno 1517