BRU-AGSB-Z-62

Algemene gegevens

Opmerkingen analytische datum: Callewaert(1), 136, nr. 125: 'Octobre 1289'.

Type: Verkoop door Watiers De Heule van een tiende te Zonnebeke aan de abdij van Zonnebeke

Beschrijving: Watiers De Heule, ridder, verklaart een tiende in de parochie van Zonnebeke verkocht te hebben aan de abt en het klooster van Zonnebeke. De tiende behoorde tevoren aan Jehan le Witte, en ze wordt gehouden van heer Watier de Niviele. Watiers doet voor zichzelf en zijn nakomelingen afstand van alle rechten op die tiende.

Opmerking: Callewaert(1), 136, nr. 125 vermeldt: “Au dos annotation contemporaine: De decima quam emimus contra Johannem Witte et Henricum Wavelare. Annotation plus récente: Emptio alicujus partis decimae contra Dominum Walterum de Heule.” // Callewaert(1), 136, nr. 125 vermeldt een kopie in Cartularius S, kap. 18: De decima H. Wavelare et Johannis Witte. // Callewaert(1), 136, nr. 125 vermeldt een beschrijving en samenvatting in de Inventaire Diplomatique, p. 107. // Callewaert(1), 136, nr. 125, voetnoot 1 vermeldt: “Voir nn. 126, 127.”

Tekst

[Overgenomen uit Callewaert(1), pp. 136-137, nr. 125]

[p. 136] Jou Watiers De Heule, chevaliers, faic savoir a tous cheaus ki ceste presente chartre verront et orront ke jou ai de ma boine volentei et pour men proufit aparant vendu hiretablement a labbeit et au covent de Zinnebeke une disme ke jou avoie en la parochie de Zinnebeke, ki jadis fu Jehan le Witte, et toute le droiture ke jou ai en celi disme, avoie et avoir poroie jou et mi hoir. Lequele disme on tient de mon seigneur Watier de Niviele, de lequele disme et de toute le droiture, je Watiers de Heule avant nommes men tieng del tout a bien paies et lor aiencovent comme loyaus chevaliers a warandir encontre tous cheaus ki aucune cose i poroient demander par locoison de moi et de mes hoirs. Et en sui jou Watiers de Heule issus de celi disme et de le droiture bien et loialment et aloy et par devant les homes et li abbes et le couvens de Zinnebeke bien et par loy a hireteit. Et jou Watiers de Heule devant dis ai jure et plevi par foit fiancie et par sairement ceste convenance et cest vendage de ceste disme et de toute le droiture a tenir et a warandir je et mi hoir bien et loialment comme loyaux chevaliers por moi et por mes hoirs: et ke james a nul jour pour besougne ke jou avoir puisse ne mi hoir a ceste disme et a le droiture avant nommee ne puis nule riens demander ni calengier je ne mi hoir

[p. 137] Et se en aucun tans je u mi hoir u aucuns de par moi u autres ques ke il fust en calengaissent le disme et le droiture avant nommee par coi li abbes et li couvens de Zinnebeke de ledite disme et de le droitur ne peuissent ghoir bien et paisiblement, jou Watiers de Heule lor ai encovent por moi et por mes hoirs a tenir descalengier encontre tous. Et pour ceste convenance mieus tenir a aemplir, jou ai obligiet moi et mes hoirs et tous mes biens u qui il soient et estre poroient troveit por parfaire et pour aemplir a labbeit et au covent de Zinnebeke le vendage et le convenance de le disme et de le droiture devant dite. Et toutes ces choses avant nommees tout ensi comme elles sunt en ceste presente chartre dites et devisees ai jou Watiers de Heule por moi et por mes hoirs promit et encovent par le foi ke je doi a tres noble homme et poissant mon signeur le conte de Flandres et sour le foi et le sairement de men cors bien et loialment a tenir et a faire tenir et a emplir au devant dit abbeit et au covent le vendage et toute le convenance de le disme et de toute le droiture avant nommee, et ke je ne ferai ne querrai art ne engien ne cose nule par moi ne par autrui quele ke ele soit ne ki avenir puist, par coi l abbes et li covens avant dit en soient ariere ne agreve de le disme et de le droiture devant dite. Et prie et requier a mon segneur Watier de Niviele ke il conferme et voeille confermer cest vendage de cele disme et toutes les convenances avant dites tout en tel maniere comme elles sunt en ceste presente chartre dites et devisees, et me constragne moi et mes hoirs a ce ke jou et mi hoir aemplisons au devant dit abbeit et au covent le vendage de le disme et de toute le troiture devant dite. A ceste convenance fu Robiers aisnes fieus au conte de Flandres, cuens de Nevers, Willaumes de Mortagne, Sohiers de Bailleul, chevalier Eustasses Hauwiel et Jehans Lauwart. Et pour cou ke jou Watiers de Heule chevaliers avant dis voeil ke toutes ces coses avant dites soient fermes et estables et loialment tenues en boine foit de moi et de mes hoirs, si ai jou ceste presente chartre seelee de mon proppre seel pendant e donnee au devant dit abbeit et au covent de Zinnebeke.

Ce fu fait en lan del Incarnation nostre Seignour Jhesu Crist mil deux cens quatrevins et noef, el mois doctobre.