BRU-AGSB-Z-n1692

Algemene gegevens

Opmerkingen analytische datum: Het stuk is niet gedateerd. // Bijkomende dateringen: "Jnt Jaer lxxxviij voor medewintre" (vóór 21/12/1488); "Int Jaer xc" (1490).

Type: Proces voor de schepenen van Roeselare tussen de abdij van Zonnebeke, tiendenheffer te Roeselare, en [Willem van Stamps,] tiendenpachter, betreffende de betaling van de tiendenpacht

Beschrijving: De abt van Zonnebeke spande een proces aan [tegen Willem van Stamps] voor de schepenen van Roeselare betreffende de pachtsom voor de tiende te Roeselare die Van Stamps van de abdij pacht. Van Stamps is niet bereid het bedrag te betalen dat de abdij vraagt. De verweerder probeert de argumenten van de abt te weerleggen: hij wilde de tiende niet echt en heeft meermaals geprobeerd ze terug te geven, de tiende is niet meer waard wat ze vóór de oorlog en de verwoesting van Roeselare waard was, en hij betaalde een deel van de pacht in natura en ontving daarvoor een kwijtschrift, maar dit kwijtschrift werd nadien niet aanvaard door de nieuwe abt.

Opmerking: Kopie.

Tekst

[VOORLOPIG]

Copie

Omme te dupliquierne vp de Replique ghedaen bijden prelaet van zunnebeke voor hulieden mijn heeren die scepenen zijt vander stede van Roessel[aere]

Eerst daer mj mijn heere anzeecht dat Jc gillis vander hamme die pachter te vooren gheweist hadde onderhuert hebbe de thiende daer questie of es ende dat gillis boet eenen andries guldene te eenen gods penninc vp thopen pachter te bliuene ende verdraecht hem van dien Inden eedt van gillis vorseijt

Andwoorde daerup dat mj verwondert ouer dat hij es man van eeren ende een gheestelic persoon dat hij mj anzegghen wille dat hij zelue wel weet dat niet waerachtich es ende gillis vander hamme van ghelijken want daer de voorseijde thiende verpacht was bouen gillis vander hamme daer en was Jc noch an noch bij maer gheloue wel dat pierkin mijn zone qualic bedocht wesende bij middel van her pieter goetghebuer zijnen oom die doe vele gheloofs Jnt conuent hadde de thiende pachte Jeghen her Loye die doe In dien tijt prelaet van zunnebeke was dat wel bliken zoude waert nood aldus moet hij In dit stic wel onghelijc hebben

Ten tweesten her loy die doe prelaet van zunnebeke was ouer ziende de orloghe die was Jnt land ende dat Roesselare was verberrent ende ghedestrueirt ende tannemen van pierkin mijnen zone die hij ziin thiende verpacht hadde hem beureesende dat hij van zijnder thiende gheen proffijt hebben en zoude ende dat gillis vander hamme de thiende doe niet langher gehouden en wilde begheerde an mj dat Jc ziin thiende zoude willen pachten Jnt bescudden van zijnen goede hebbe al daer de thiende ghepacht naer tinhouden vander kennesse die hij onder hem heift daer wij waren onder ons beeden

Ten derden daer hij zeicht dat thomaes vander strate de thiende niet ghepacht en heift noch hem zeluen verbonden ghelijc als Jc mj verbonden hebbe Andwoorde daerup dat Jc In mijn weere niet gheseit en hebbe dat thomaes vander strate de thiende ghepacht hadde noch hem zeluen verbonden Maer hebbe gheseit dat thomaes

vander strate quam om de vorseijde thiende te pachtene ende dat mijn vorseijde her loy mj ontboot ende vraechde of Jc de thiende behouden wilde of dat hijse verhueren wilde thomaes vander strate vp twelke Jc andwoorde dat mj de thiende niet an en stont ende begheerde anhan dat hijse ouernemen wilde ter presencien van goede lieden dat wel blijken zoude wat[?] noot vp twelke dan hem mijn heere brect met eeneghen die bij hem waren ende andwoorde mj willen dat de thiende In ende bezoorchse esse verberrent bijden orloghe ghij en zulter niet af gheuen

Ten vierden angaende daer hij zeicht dat de thiende maer verdrierst en es ij £ g. ende galt ouer xx of xxv Jaeren xvj £ g. doe was Roessel. in wesene ende soet verberrent naer Jnt Jaer lxxxviij voor medewintre also Jc de thiende pachte int langhe ghelt doe was Roessel. verberrent ende ghedestrueirt ende daer en mochten gheen lieden ...t payse ghedueren aldus en mach dat niet ghelijken

Ten v.en daer mijn heere mj anzeecht dat jc goede Jaerscaren ghehadt hebbe ende an zin thiende ghewonnen Andwoorde daerup dat te Roesselare heift gheweist zorghelic ziin hadt mijn heere nu es ghelieft hij hadde mueghen de thiende ouernemen want Jc hebse hem ten velen stonden ghepresenteert aldus en heift hij gheen cause mj te verwijtene dat Jc an ziin thiende ghewonnen hebbe

Ten vj.en daer mj de vorseijde heere anzeicht dat Jc de payementen hebbe betaelt ten zulken prijse als tghelt cours hadde ten daghe dat de payementen gheuielen niet mencioen makende van zulken prijse alst ganc hadde ten daghe vanden coopmanscepe Andwoorde daerup al waert dat Jc bij ongheuroedene betaelt hadde iij of iiij Jae meer dan Jc bij Rechte sculdich was daeromme en ware dat gheen Recht omme de toecommende Jaren ende mijn ghed. heere es mj moghende van dien te Re...uterne

Ten viji.en Daer hij mj anzeecht dat hem dunct dat Jc hem oghelijc

doe Andwoorde daerup dat Jc hem hebbe ghepresenteirt eer wij begonsten dinghen In dien dat Jc hem eenich onghelijc veerchd... dat hij zoude wille nemen twee mannen Jeghen mj een Jc zoude dat beteren te huerlieder ordonnantie ter presentie van goede mannen aldus moet hij in dit stic wel onghelijc hebben

Ten viij.en daer hij zeicht datter appointement tusschen ons beeden ghebuert es ter presencien van meester Jan de vroede prochiepape van sinte martins was tijpre her Roeger van stamps mijnen broedere ende meer andre ghedaen Int Jaer xc Andwoorde daerup dat mj mijn heere loy voorsate van her Jan die nv vercocht hadde een vette roe ende olye omme den oorboor vanden conuente vj £ g. vp twelke hij an mj begheerde dat Jc zoude willen laten staen vp tpayement dat vallen zoude te medewintre ende paesschen daernaer vp twelcke Jc andwoorde dat Jc tgheent doen zoude behouden dat Jc quiten van dien hadde vp twelke dat hij mj quitancie gaf bij wetene vanden conuent want her hector de vroede die doe prochiepape van zunnebeke was screef zelue de quitancie het heift ghelieft her loy ter tpayement van medewintre omme quam ziin crootse te stellene Inden handen van her Jan nv prelaet In desen tijt alst payement omme quam Jc en mochte her Jan gheen payement doen metten vj £ g. die Jc ziin voorsaet duechdelic betaelt hadde ende was gheaccordeert bij meester Jacop den vroede den conuente ende her Roeger van stamps mijnen broedere zouden mj de vj £ g. payement doen Jc moeste hem gheuen ij £ g. den dobbelen stuuere ten tween oude placken dinckende datmen mj onghelijc dede hebbe gheseit dat Jc heerden zoude tonghelijc dat zij mj daer daden ende betalen de ij £ g. behouden dat hij de thiende ouernemen wilde Niet Jeghenstaende dat mj tbeste lot... van drien Jaerscaren stont ten oust daernaer ende hadde beede de aerchste loten in ghedaen ende vpen dien datter eenich ander appointement ghemaect es dat hij zegghe Jc en hebber niet bij gheweist dat Jc hem doe de thiende presenteerde ende zichtent ten vele stonden ghepresenteert hebbe Jc make hem van dien deelinghe van eede ende noch presentere

Ten ix.en zegghe dat de vorseijde heesschere mj gheheescht heift Int maken van zijnen heissche xi £ g. ende In zin Replique zijnen heesch verdiept ende gheheescht xviij £ g zegghe naer Rechte dat zijnen heesch behoort van onweerden te zijne ende niet ontfanghelic In Justicien

Zegghe naer Rechte anghesien dat de zelue thiende ghepacht es Int langhe ghelt ende de zelue thiende hem ziin voorsate hebbe ghepresenteirt ende ghedaen presentere ende noch presentere dat hij behoorde zin thiende behoorde ouerghenomen te hebbene of dat hij behoort te vreden te zijne met zulken ghelde als cours hadde ten daghe dat de coopmanscepe ghebuerde payement doende dat Jc hem betaelt hebbe ende ghenamptiseirt onder de wet van Roessel. bem Jc hem yet sculdich of tachter Jc wil hem te vullen betalen mj onuerlet staende vp dat beuonden worde dat Jc hem te vele betaelt hadde dat vp hem te vercouurerene