BRU-AGSB-Z-n1710

Algemene gegevens

Opmerkingen analytische datum: Het stuk is niet gedateerd. // Bijkomende dateringen: "Jnt Jaer lxxxix ende xc" (1489 en 1490); "Jnt iaer xc" (1490); "vanden Jare xcj ende xcij" (1491 en 1492); "Jnt Jaer duust vierhondert lxxxviij den xv.en van nouember" (15/11/1488); "vanden oust xciiij" (1494).

Type: Antwoord door de abdij van Zonnebeke in haar proces tegen Willem van Stamps, die een tiende van de abdij te Roeselare pachtte

Beschrijving: De abdij van Zonnebeke, eigenaar van een tiende te Roeselare, antwoord voor de schepenen van Roeselare op het verweer van Willem van Stamps, die de tiende pachtte en die door de abdij voor het gerecht gedaagd werd omdat hij de afgesproken pachtsom niet betaalde.

Tekst

[VOORLOPIG]

Replijcke van mijnen heere van zunnebeke ende zijnen conuente vpt verwerren van willems van stamps voor huleden mijnen heeren die Scepenen zijn vander stede van Roeselare

[Vpt] eerst[e] [artikele] daer willem ... hem beclaecht dat wij abt hem anghezeit zouden hebben dat hij doude pachtere van onser tiende Jn Roeselare onderhuert heift Ende verdraecht hem dies Jnden eedt van gillis van hamme die pachtere te vooren ghezijn hadde wij zegghen voorwaer Ende verdraghens ons dies Jn gillis van hamme dat gillis vorseit gods pennijnc ghegheuen hadde mijnen heere van zunnebeke onse voorzate eenen gulden Sijnte andries vp hoope pachtere te blijuene dies hem niet ghebuerde bijden onderhuerenne van willem vorseit mids gaders dat hij vrienden daer omme ghemoeyt hadde

JTem daer hij verhaelt van thomaes vander strate dat de vorseide thomaes de vornomde tiende hueren wilde het es wel mueghelic maer het en blijct niet dat hijse ghehuert heift noch hem zeluen verbonden die te betalene Ende voort daer hij hem beclaecht als dat wij nu heere van zunnebeke niet te vrede ghezijn en hebben van eeneghe paymenten dies hij quitanche wiste te betoghenne grotelicx Jn ons Erren ende schade wij zegghen voor waer Jn ghelijcke wijs als hij zelue Jnt vierde artikele van zijnder werre verhaelt blijct dat apointement tusschen ons gheschiet es van dien ende houden ons vanden vorseiden apointemente te vreden

JTem voort dat de vorseide willem zoude willen zegghen dat hij onse vorseide tiende ghehuert heift Jn langhe ghelde ende zeere verdierft het blijct dat hij maer twee ponden grooten verdierft en heift twelke hem van nooden was zoude hij den pacht ghehebt hebben want de oude pachters de naeste gheweist zouden hebben Ende de vorseide tiende hadde daer te vooren ouer xxv of xxx Jaer also de vorseide willem zelue wel kent Jn zijn verwerren xvj £ grooten of daer ontrent ghegholden aldus zegghen wij dat wij de vorseide tiende naerden lichteghelde niet verhuert en hebben maer naerden ouden loopt Jn Relicheden Ende de vorseide willem heifter goede Jaerscaren bin zijnen pachte ghehadt dat ons lief es Aldus zo dijnct ons heere van zunnebeke ende ons conuent heesschers dat willem vorseit ons onghelijc vercht dat hij ons paymenten niet en bezorcht Jn tijden alzo zij vallen want hier te vooren wij van hem ontfaen hebben de paymenten Jn zulken prijs alst ghelt ganc ende cours hadde Jnt lant van vlaendere ten tijden als de paymenten ghevallen waren Jnt Jaer lxxxix ende xc tmeeste deel van paymenten niet heesschende zulken prijs alst ghelt cours hadde ten tijden als hij de vorseide tiende huerde ende willem vorseit ne heift ons ooc heere ende conuent gheene zulk munte gheboden noch mensioen Jn dien tijden der of ghemaect dus zo wij ghezeit hebben ons dijnct dat hij ons groot onghelijc vercht anghezien dat Jnt iaer xc vriendelike appointement tusschen ons ghemaaect es gheziin bij ghoede notabele mannen als meester Jacob De vroede prochipape van sint maerts typre her roeger van stamps ziin broedere ende andre Ende daer naer zo heift willem vorseit ons betaelt vanden Jare xcj ende xcij zonder eenighe zwariheit te makene Aldus gheconsidereert alle zaken wij werwondren zeere dat hij ons eenich dilaije ons betalinghe doen wille

JTem ten anderen artikele daer hij zecht dat hij onsen voorsate heere van zunnebeke ghepresenteirt heift ons tiende omme te gheuenne wij ne connen niet weten watter waer of wesen mach want zij met gode zijn Ende ter conclusie van desen wij houden ons ande vorwaerde ende verbanden Jnde welke willem van stamps hem verlouen? heift voor scepenen van Roeselare Jnt Jaer duust vier- hondert lxxxviij den xv.en van nouember also hulieden mijnen heeren die scepenen zijt wel kenlic wesen mach bij zulken bezeghelde letteren die wij betoocht Hebben Jnt maken van onsen heerssche also de fert...e van dien wel mensioen maken mach dus zo heersschen wij den vorseiden willem also wij voren ghedaen hebben de Somme van xviij £ grooten verschenen payments vanden oust xciiij ofte te mueghende blijuen ligghende of beede van onsen weghe legghen ten xx s parisis sdaechs naer den Jnhouden vanden verbanden Aldus mijn heeren wij verzoucke Recht

Thiende Jn Roesselaere