BRU-AGSB-Z-158

Algemene gegevens

Analytische datum: 02-10-1492

Type: Ontslag door de kapelaan van de broederschap van OLV te Roeselare, en permutatie met de pastoor van Hedegem

Beschrijving: Notaris Johannes van Ouerberghe verklaart dat Petrus de Dondere, kapelaan van de kapelanij van de broederschap van OLV te Roeselare, een aantal personen aanstelde als zijn procureurs, om het volgende te bewerkstelligen: Petrus doet afstand van zijn beneficie als kapelaan, en via permutatie ruilt hij met Adrianus de Witte, pastoor van de kerk van Sint-Germanius te Hedegem.

Tekst

[overgenomen uit Angillis(2), 158-161]

[p. 158]

In nomine Domini amen. Per hoc presens publicum instrumentum cunctis pateat evidenter et sit notum, quod anno ejusdem Domini millesimo quadringentesimo nonagesimo secundo, indictione decima, mensis vero octobris die secunda, Pontificatus sanctissimi in Christo Patris et domini nostri

[p. 159]

domini Alexandri, divina providentia pape sexti, anno primo, in mei notarii et testium infrascriptorum ad hoc vocatorum specialiter et rogatorum presentia, personaliter comparens et constitutus discretus vir dominus Petrus de Dondere, presbyter, capellanus capellanie confraternitatis Beate Marie Rollariensis, Tornacensis diocesis, ex ejus certis scientia propositoque deliberato, omnibus via, modo et forma, quibus scivit et potuit, potestque et debet melioribus, dilectos sibi et fideles magistros Willelmum Cammelin, Walrandum de Crudenare, Ludovicum Wandele, Nicolaum de Rant, presbyteros, Johannem Dibbout, Johannem Corvilain, Johannem Vanderheede, Petrum Scots et Paulum Plumier suos fecit, constituit et solemniter ordinavit veros, certos, legitimos et indubitatos procuratores, actores, factores, negotiorum suorum infrascriptorum gestores, ac nuncios speciales et generales et eorum quemlibet insolidum, licet absentes tamquam presentes, ita tamen quod specialitas generalitati non deroget, nec e contra quanquam non sit melior conditio primitus occupantis, subsequenter, siquidem unus ipsorum inceperit, alter eorundem id prosequi valeat, mediare, terminare, et finire signanter et expresse in nomine ipsius constituentis, et pro eo, dictam sum capellaniam confraternitatis Beate Marie Rollariensis, in manibus reverendi in Christo patris et domini, domini Episcopi Tornacensis vel venerabilis viri ipsius reverendi in Christo patris vicarii generalis aut illius vel illorum in cujus seu quorum manibus hujusmodi capellanie resignatio de jure vel consuetudine fuerit facienda. Causa tamen permutationis et non alias de eadem fiende, cum venerabili viro domino Adriano de Witte, presbytero, curato parochialis ecclesie sancti Germani de Heedeghem, dicte Tornacensis diocesis, ad eandem suam curam de Heedeghem resignando et dimittendo, resitnationemque et demissionem hujusmodi ut premittitur causa permutationis, recipi et admitti petendo et obtinendo jurandoque in animam ipsius constituentis, et pro eo quod in hujusmodi permutatione fiendum sive resignatione non intervenit aut

[p. 160]

interveniet fraus, dolus, simonia aut quevis alia pactio illicita, et quecumque alia juramenta in premissis necessaria in animam ejusdem constituentis prestanda et subeunda et generaliter omnia alia et singula dicenda, facienda, procuranda, gerenda et exercenda quam in premissis et circa ea necessaria fuerunt seu alias quomodolibet oportuna et que ipsemet constituens faceret aut facere posset, si premissis omnibus et singulis presens et personaliter interesset, etiam si talia sint que mandatum exigant magis speciale; promittendo dictus constituens michi, notario publico subscripto, stipulanti solemniter et recipienti vice et nomine omnium et singulorum quorum interest, intererit seu interesse poterit, quomodolibet infuturum sub suis fide et juramento, manu pectori propter hoc apposita, ac omnium et singulorum bonorum suorum, mobilium et immobilium, presentium et futurorum, ypotheca et obligatione se ratum, gratum, firmum et stabile habere, ac perpetuo habiturum, totum id et quitquid per dictos suos procuratores vel eorum alterum in premissis actum, dictum, gestum, factum, resignatumve fuerit seu alias quomodolibet procuratum sub etiam omni juris et facti renuntiatione ad hec necessaria pariter et cauthela de et super quibus premissis omnibus et singulis, prefatus constituens petiit et instanter requisivit a me notario publico subscripto sibi et dictis suis procuratoribus fieri atque tradi publicum instrumentum unum vel plura astantium personarum testimonium invocando.

Acta fuerunt hec in villa Rollariensi, Tornacensis diocesis, anno, indictione, mense, die et pontificatu prescriptis, presentibus ibidem discretis viris dominis Jacobo de Clerc, presbytero, curato alterius portionis de Thielt, Tornacensis diocesis, Johanne vander Scuere, presbytero, curato ecclesie parrochialis de Coolscamp, eiusdem diocesis, et Clemente Coorde, presbytero, capellano dicti loci Rollariensis, testibus ad premissa vocatis pariter et rogatis.

J. De Overberch

[p. 161]

Et quia ego Johannes de Overberch, clericus Tornacensis diocesis, publicus, apostolica et imperiali auctoritatibus necnon venerabilium curiarum Episcopalium Cameracensis et Tornacensis, notarius juratus, premissorum procuratorum constitutioni ceterisque premissis omnibus et singulis, dum sic ut premittitur fierent ex agerentur, una cum prenominatis testibus, presens interfui eaque sic fieri vidi et audivi, idcirco hoc present publicum instrumentum, manu aliena fideliter scriptum, exinde confeci, signoque et nomine meis solitis signavi, hic me manu propria subscribens, in fidem premissorum rogatus et requisitus.