BRU-AGSB-Z-221bis
Algemene gegevens
Opmerkingen analytische datum: Het stuk is niet gedateerd; terminus ante quem is 01/10/1534. // Bijkomende dateringen: "te bafmesse vichthienhondert vierendertich" (01/10/1534); "te midwintere xvC viere ende dertich" (21/12/1534); "te sint Jansmesse Int Jaer xvC viue ende dertich" (24/06/1535).Type: Pachtovereenkomst tussen de abdij van Zonnebeke en Marcx Donghemate betreffende het goed van de abdij te Noordschote
Beschrijving: De leenmannen van de vorst van de Zaal en kasselrij van Ieper bevestigen dat Willem van Steelandt, abt en heer van Zonnebeke, en Marcx Donghemate, een huurcontract afgesloten hebben. De abdij verhuurt haar goed te Noordschote, dat ze zelf in pacht houdt van het kapittel van OLV te Mesen. De pacht loopt voor een termijn van 9 jaar, en brengt jaarlijk 20 pond groten en 300 pond boter op [+ bijkomende voorwaarden van de pacht]. Lampsin de Keysere staat borg voor deze transactie.
Tekst
[VOORLOPIG]
Wy Jacob van Steelandt Ende Jan de Roy mannen van leene Ons gheduchs heeren skeyszers van Rome Altyts vermeerder sRycx. Conync van Germanien van Spaengnen ende Graue van vlaendren van zijnder zale ende castelrie van ypre Doen te wetene allen Lieden Dat voor ons commen ende ghecompareirt zyn den Eerweerdeghen Heere, Willem van Steelandt Abt ende heere vander Kercke ende heerlichede van zunnebeicke ouer hem metgaders den Prior ende conuent ouer een zyde Ende Marcx donghemate ouer andere Aldaer myn voirnomde heere prior ende conuent Kenden wel ende duechdelicke verhuert hebbene ende den voirseyde marcx ghehuert ende In pachte ghenomen hebbende huerlieder goet In Noordtscoten In zulcker grootten van landen ende met den woonhuusen scueren ende stallen Alst den voornomde pachtere tot nv toe jnpachte ghehouden heift metgaders noch zesse ghemeten Landts ende emmers de vierhoucken ende middelwaert w[...?]ck ende den hoop als myn voirnomde heere gheuert ende jn pachte heift vanden Deken ende capitele van onser vrauwen kercke van meessene Eenen termyn van neghen Iaeren deen den anderen achteruolghende Ende dat omme de somme van twintich ponden grooten siaers zuuers ghelt ende bouen dien alle Jaere drie hondert ponden buetre te Leueren Int conuent thuerlieder gheliefte In elck iaer goet duechdelick ende ghetrauwe goet zonder mynderinghe vande vande voirnomde xx £ grooten wanof het eerste betaelende Iaer vallen zal te bafmesse vichthienhondert vierendertich Te betaelene de voirseyde somme van xx £ grooten alle Jaere ten tween payementen te weitene te midwintere ende sint Iansmesse naer elcker gheuallen bafmesse Danof teerste payement viel te midwintere xv.C viere ende dertich ende tandere te sint Jansmesse Int Jaer xv.C viue ende dertich Daernaervolghende Ende alzoo voort van Iaere te Jaere ende Payemente te payemente toten expiereren vande voirnomde Neghene Iaeren wanof den voirnomden huerdere mynen voirnomden heere als verhuerdere betaelt heift den behoorlicken godspennync ende van Lyfcoope twee gouden croonen ter tafele vanden conuente Al vp conditien ende bespreicken hiernaervolghende aluooren den voirnomden huerdere es ende wert ghehouden alle Iaere myn heere te ghersene een vol voor thien schellinghen grooten indient myn heere belieft te zendene Ghehouden oock alle Iaere Renten hominen Landsculden Watringhen ende generalic alle costen ende Lasten diere vpcommen of commen mueghen te betaelene ende wederstaene ende quitt[...?]en ouer te bringhen ter ontlastinghe vander kercke zonder betaelinghe daermede te doene vp peyne Indien by zynder negligentie van betaelinghen costen vpquamen Die te betaelen ende berreecken vpden huerdere ende zyne boorghen Item den voirnomden huerdere Kende ende verbandt hem alleenlyck te brekene binnen dese zynen pachte drie ghemeten gherslandt omme te saeyen ende dat vp verstoicken[?] tynne vanden pachte ende die drie ghemeten wederomme ghers te latene drie jaeren ouds tzyne afscedene Jtem de huusinghe vp tvoirnomde goet staende heift den huerdere ouerghenomen In pryse Te wetene twoonhuis metter nieuwe camere voor zeuene ende veertich ponden grooten De schuere voor zesse ponden grooten de westcoestallen metter poorte ende tzwynstal voor twaelf ponden grooten Jtem te dese pryse zal myn voirnomde heere alle de voirseyde huusinghen oft zulcke parcheelen van dien alst hem belieuen zal wederomme hebben ende ontfanghen ende gheene bate gheuen vander ghemeene noodtzake Refectien Te wetene van [...?]llen stylen ende van dake of dies ghelycke Maer Indien datter eenich groot nieuwerck van stallen van huusen van scueren of een groot deel van dien nieuwe ghemaect werde Den voirseyden pachtere zal beteringhe hebben ten zegghene van goede mannen ende ander niet Jtem Indien de voirseyde huusinghen of eeneghe van dien by winde by brande of by messchiene verbrandt worden ofte te nieuten ghinghen den voirnomden pachtere oft by zyn ghebreke zyn boorghe wert ghehouden andere huusinghen te stellene, thuerlieder costen Oft emmers den pris vp telegghen [...?] ghelde wel verstaende dat meschief ende Infortune van blicxme ende van oorloghe es wert ten laste van myn voirnomde heere Den voirnomden marcx en mach desen pacht [...?]emendt verhueren noch [...?] vanden goede voe[...?]en noch Laeten voeren zonder tconsent van myn voirnomde heere Jtem den voirnomden huerdere heift ouer In laetpryse bouen de voirnomde huusen de Somme van viue ende tzestich ponden thien scellinghen parisis Dies behout myn heere te hemwaerts de steenweighen Int hof Den pachtere heift In bewaerenesse hondert ende viue ende twintich vpgaende boomen Achtyene ghegreffede appelhenten zeuen hondert ende zestyene wulgheb[...?]ken Ende en vermach gheen houdt te hauwen noch boomen te tronckene voordere dan haecx ende haumes schuldich zyn van gaene Jtem dat al goet vast ende van weerden wesen zoude al tghuendt dus voirseit es ende alle de conditien wel ende duechdelick te vutcommene Soo hebben de voirnomde huerdere ende verhuerdere voor ons mannen van Leene verkent ende by desen beckennen De voirnomde huere goet duechdelicke ende affect ghemaect zynde Inder manieren bouen verclaerst Belouende die alzoo te houdene ende onderhoudene Ende In verzekertheden van dien Lampsin de Keysere voor ons in persoone comparerende heift hem beckent boorghe ende by desen verkent de boortocht ouer den voirnomden marcx donghemate alle de conditien te vulcommene Indien hij In ghebreke waere Daerinne verbyndende elcken onderlinghe den voirnomden Marcx ende Lampsin huerlieder persoons ende al huerlieder goet present ende toecommende vp tconstrainct vanden vyfsten pennync tons gheduchs heeren prouffyte Jn Kennesse der waerheit hebben wy Mannen bouen ghenompt Dese presente Letteren ghedaen zeghelen met onsen zeghele vuthanghende
Pachtbrief in Noordschote 1535 Maercx Dumaet
Noordtschote Diuersche pachtbriefuen voor t'Ghoet aldaer